Amie Sison

Tinanong ko ang ilan nating kababayan
Kung ano ba ang tunay na kahulugan
Ang mahalagang pagdiriwang ng kapaskuhan
Nadama ko ang sagot na may kagalakan.

Nakakamiss ang selebrasyon ng pasko sa atin
Setyembre pa lamang ay pinaghahandaan na natin
At ang pasko ay sama-samang sasalubungin
Bibigyan ng halaga ang araw na importante sa atin.

Pamilya ang sentro ng simpleng kaligayahan
Ito ang sagot ng ating kababayan
Pamilya na hinahanap at ninanais nilang balikan
Upang mainit na yakap ay kanilang maramdaman.

Inaasahan ang kalungkutan sa bawat kababayan
Lalo na sa mga unang taon na mangibang bayan
Ngunit hihiling ko na ito ay lubusang maiwasan
Sapagkat nandyan ang bawat samahang makabayan.

Sa Pasko, walang Pinoy na mag dirirwang na mag-isa
Kahit pagod, pighati o medyo butas man ang bulsa
Pusong pinoy pa rin mangingibabaw kahit nasa Korea
Dahil nakatatak na puso natin ang kaarawan niya.

Ilaw na kumukutikutitap ay naglipana
Naggagandahang parol ay nakasabit na
Krismas tri ay napapalamutian na ng saya
Pasko sa kapaligiran ay damang-dama.

Mga handog na regalo ay nakahanda
Kahit ano lang basta galing sa pusong dakila
Ang mesa ay punung-puno ng pagkain
Para sa Noche Buenang pagsasaluhan natin.

Pagsimba sa madaling araw ay tapat na ginagawa
Sabay-sabay na maglalakad at tuwang-tuwa
Siyam na araw ang panata
Para sa Misa de Gallong alay natin sa Maylikha.

Pamilya't kaibigan ay magtitipon-tipon
Di pagkakasundo ay itatapon
Pagmamahal sa kapwa ang iyong madarama
Saan man at lalong-lalo na kanino man.

Ito ang paskong nakasanayan
Hinahanap-hanap ko ngayon ng mangibang bayan
Dahil ito ay papuri at parangal
Sa pagdating ng Sugo at Tagapagligtas ng sangkatauhan.

Maligayang Pasko at Manigong Bagong Taon sa inyong lahat!

prev / next